同朋友黎呢間法式小清新餐廳午餐，裝修格調舒適宜人，環境相當不錯，仲有打卡位提供給客人。

法式鹹薄餅配煎蛋藜麥沙律配煙肉）$118

第一次嘗試法式薄餅，覺得好驚喜，薄餅鬆軟，仲有淡淡既芝士香味，再配上洋蔥條、椰菜花同煙肉，口感更佳。

法式多士 $88

呢件多士我真係拒絕唔到，擺盤夠曬靚，一上黎就忍唔住幫佢影相。
烤到金黃的多士，外層微脆，內層卻入口即融，再配上藍莓草莓同忌廉口感豐富得黎又唔會覺得漏。

伯爵奶泡 $48
伯爵奶泡茶底香濃，表面仲有一層奶泡，飲落幾清新。

雜莓乳酪冰沙 $58
雜莓乳酪口感酸酸甜甜，相當不錯

總結：餐廳價錢比普通西餐廳更抵，諗唔到食物質素咁高，一定會推薦朋友黎食。

Boon (觀塘)
觀塘駿業里10號業運工廈14樓G室

餐廳：Boon (觀塘)
地址：觀塘駿業里10號業運工廈14樓G室

唔知你覺得食飯喺唔喺一種恩賜呢？最近去咗觀塘一間新嘅fusion餐廳，以法式菜為主，加入日式元素，佢地每款菜式都加入一啲獨特元素，希望客人可以食到出面食唔到嘅菜式。餐廳名叫「Boon」，意思即喺恩賜，老闆最希望客人嚟到呢度relax又開心，好似得到一份禮物咁，而餐廳充滿唔同手工藝植物同乾花，襯埋簡約風格形成一種小清新風氣

今次同朋友食咗個early dinner，叫咗：
1️⃣炸蠔 $58
2️⃣封門柳 $168
3️⃣士多啤梨法式甜薄餅配意大利gelato $98
4️⃣Chocolate Latte $48
5️⃣雜莓乳酪沙冰 $58

話明喺法式享受，餐廳唔會催你食完就要走，比你喺用餐嘅過程慢慢聽住舒服嘅音樂，同朋友傾吓偈，享受一個真正慢活嘅空間

先嚟嘅喺飲品，我飲嘅Chocolate latte，唔好比個名呃到，其實入面係冇咖啡成份，latte之意在於飲品面頭嘅鮮奶泡泡，而佢地選用嘅可可粉飲落有濃郁朱古力香，形成漸變層，加上燒過嘅Marshmallow，又幾似雲上雲☁️；朋友飲嘅雜莓乳酪沙冰由raspberry、黑加侖子、士多啤梨等打製而成，加入埋yoghurt，淨喺粉紅色嘅造型都夠哂奪目

佢地嘅炸蠔喺嚟自日本，經老闆嚴選之下先揀出呢款炸完依然好爆汁嘅生蠔，而且外層唔厚，唔會食到成口粉；封門柳配上燒鰹魚片，薯蓉加入紫菜元素，仲有自家打造嘅昆布牛油汁，可以話完美示範咗一道菜點樣將日式同法式融合，封門柳煎至接近五成熟，色澤紅潤帶點熟成嘅顏色相當吸引，食落配埋脆脆香口嘅鰹魚片真係好特別

不得不提緊喺甜品啦，薄薄兩片嘅法式甜薄餅，加上雲呢拿味嘅gelato，再畫上士多啤梨醬同加上鮮士多啤梨果肉，未食都已經流晒口水，打返張卡先啦，笑～～～