餐廳：Al Forno Cafe and Bar (銅鑼灣)
地址：銅鑼灣告士打道218號地舖

仲記得年幾兩年前同一個美國朋友去到中環Soho區嘅Al Forno Pizzeria食飯，佢地嘅pizza真係一食難忘，但原來上年年中佢地結業咗。不過佢地岩岩1月12號強勢回歸，喺停業期間老闆同團隊仲不停鑽研咖啡同cocktail，以Cafe and Bar嘅形式喺銅鑼灣繼續同香港人一齊be water，一齊走落去

烤蘑菇黑松露炒蛋牛窩夫 $90
韓國大熱嘅牛角窩夫，估唔到係呢到會搵到，將鬆脆嘅牛角包，放入窩夫機烘壓，食落同時有窩夫同牛角包嘅口感，香脆而實在，加上香滑嘅炒蛋，配埋烤蘑菇同黑松露，無論食定睇都咁正

自家製四式芝士薄餅 $128
用上義大利blue cheese Gorgonzola、全世界最巨型瑞士芝士之一嘅Emmental、意大利盛產嘅綿羊奶芝士Pecorino，仲有我地好常食嘅Mozzarella，呢四款芝士製成呢個超濃郁芝士pizza，又可以拉絲，又食到多層芝士口味，芝士迷你仲等咩

Latte Tiramisu $58
唔知大家鍾唔鍾意食tiramisu呢？自問我就係一個愛好者，其實正統嘅tiramisu係用Savoiardi Verona(俗稱Lady Finger，因為隻餅好似手指)整嘅，佢嘅吸水性好強，成條浸入Latte入面，吸收晒latte同埋Lady Finger上面餐廳自己Homemade嘅cream，就好似食緊tiramisu海綿蛋糕咁，有得食又有得飲☕️，影出嚟仲好靚添

Nitro Cold Brew $52
咖啡成日飲☕️，冷泡咖啡都飲過幾次，有氣嘅冷泡咖啡你又試過未？將氮氣打入冷泡咖啡入面，估唔到又幾refreshing，又認識多一款飲咖啡嘅方法喇

餐廳嘅簡約風格好有韻味，無論門口定室內，隨便一個位都可以輕鬆打卡，同朋友過嚟飲杯嘢傾吓偈真係一流