餐廳：花楽 (將軍澳)
地址：將軍澳唐俊街21號翩滙坊地下G23號舖

將軍澳翩滙坊果到將會喺我一個要慢慢發掘嘅美食新天地，果到雲集咗各式各樣嘅餐廳，有唔少日式餐廳、bar同cafe☕️，而今次我就去咗呢間2021年1月中先正式開張嘅日式餐廳——花楽

落地玻璃配上梅花櫻花嘅壁畫，亦有唔少日本名酒同趣緻擺設，好有日式風味

上壽司定食 8貫 $248
除咗選用新鮮高級刺身魚類食材之外，餐廳仲專程由四季酒店聘請日式料理師傅駐場操刀處理壽司刺身，刀功同切法與別不同，比你試到另一番嘅享受。8貫壽司有老翁魚、比普通魷魚更爽口順滑嘅螢光魷魚、肉質飽滿嘅海鱸、油甘魚、赤鯥等；赤鯥喺高級魚食材，油脂豐富，味道鮮美；金目鯛鮮甜爽脆；平時食嘅帆立貝都係急凍貨色，解凍後令鮮味流失，今次食嘅帆立貝由日本新鮮連殼運港，鮮甜得嚟稔性仲好高，口感豐富，食完口腔被果陣鮮味包圍好耐都未散。叫呢個定食仲有一碗烏冬添，真係唔洗驚唔夠飽

日式照燒雞扒定食 $98
呢到嘅照燒雞扒真係唔惹少，雖然望落賣相就一般，但係經過慢火燒烤過後，皮岩岩好燒到極緻，皮脆而不油膩，岩岩同雞扒肉輕輕脫離，而咬開雞扒有輕輕肉汁淺出，好juicy，蘸埋照燒汁同連埋御飯一齊食就更加好味

所有定食仲送沙律、茶碗蒸、漬物、麵豉湯同御飯，新張期間仲送櫻花和菓子甜品添；值得一提佢哋嘅茶碗蒸蛋香嫩滑之餘仲非常足料，裡面有雞肉、蓮子、蝦、冬菇、鳴門卷等，喺我食過最多料最好食嘅茶碗蒸；而櫻花和菓子面頭仲有一塊乾花，好靚好吸引呀，呢餐真係大滿足呢！