今日要去銅鑼灣做嘢，收工去希雲街買雞蛋仔食，順便買些外賣回家做晚餐。記得之前睇過食評，話禮信大廈入面新開咗間韓菜料理店「韓二妹」，一於過去八下。

餐廳嘅位置雖然有點隱蔽，但其實一點也不難找，可以由希雲街、禮頓道或加路連山道進出，位置四通八達。

店舖地方不大，以外賣為主，不過入面亦設有數張高腳檯櫈，以供客人堂食之用。

先睇下餐牌，食物選擇都幾多，除了炒飯、拌飯、紫菜包飯和炸雞，另外仲有兩款撈丁、牛角包、意大利包及貝果等供應。

點咗豚肉拌飯 ($48) 同 部隊炒飯 ($50) 各一客。

部隊炒飯用料都幾豐富，有「部隊鍋」必備的午餐肉、香腸、芝士同爽辣的泡菜，飯面仲放咗隻嬌豔欲滴嘅太陽蛋。米飯加入咗韓式辣醬嚟炒，食落香口又乾身，入口粒粒分明，撈埋啲芝士一齊食，舀起仲有拉絲效果，十分邪惡！

另外個豚肉拌飯賣相亦非常吸引，色彩繽紛。豚肉嘅口感唔錯，肥瘦適中，而其他嘅配料就仲有冬菇、大豆芽菜、紅蘿蔔絲同翠肉瓜絲。面頭嘅太陽蛋非常搞鬼，貓貓造型，十分可愛，同餐廳嘅主題非常吻合。

下次有機會再嚟，要試下佢哋嘅西式包類。