之前喺佐敦訂左十盒口罩，今日終於到貨，攞完順手去附近買啲清潔用品。

行經恒豐中心，見到之前喺旺角朗晴坊幫襯過嘅「Lockeroom Dining」，原來喺呢度開左間 fastfood shop 「Lockeroom Express」，咁梗係要幫襯下啦！

呢度雖然係以快餐店形式經營，不過裝修一啲都唔 Hea，同樣以阿仙奴足球為主題。店內掛有球員簽名嘅球衣，另外亦有一些足球紀念品，啱曬一眾足球發燒友，嚟食嘢之餘又可以朝聖一下。

餐廳採自助形式，客人要自己出去櫃位點餐，另外 Counter 對面就擺放左自助水機、餐湯同調味料，餐湯係無限供應嘅，飲完可以再添。

我哋點左意粉、飯和天使麵，另外再加左一客漢堡包同鹹蛋黃雞翼。是日餐湯為雜菜湯，一睇就知用料十足，絕無欺場，湯頭盡收蔬菜的精華，味道相當濃郁及鮮甜。

個小食鹹蛋黃雞翼 ($38) 真係超正，雞翼大隻又厚肉，而且做到金黃起沙，入口充滿鹹蛋黃嘅香氣，非常邪惡，令人停不了口。

Burger 點左冰島鮮蝦菠蘿漢堡配脆薯角 ($52)，個漢堡包賣相唔錯，外形脹卜卜，麵包好鬆軟，入面嘅炸蝦餅啖啖蝦肉，加上清新醒胃的菠蘿、惹味的芥末醬、爽脆的生菜和番茄等，多重滋味，口感好豐富。薯角份量十足，香脆可口。

另外個紐西蘭草飼牛肉眼扒意粉 ($68) 水準亦不俗，牛扒勁大塊，肉質甘香鬆化，廚師於烹調過程中只作簡單調味，保留肉眼的原汁原味，所以食落好有牛味，吃完整塊也不覺膩。意粉煮得軟熟度剛好，彈牙富嚼勁。

西班牙黑毛豬柳飯 ($58) 亦很值得一試，黑毛豬油脂豐富，肉質緊緻多汁，口感柔軟有彈性，非常美味。醬汁有 4 款可供選擇，分別是黃咖喱汁、燒汁、蒜蓉汁、黑椒汁，個人推介黑椒汁，特別惹味！

另外呢個波士頓活龍蝦配天使麵及白松露忌廉汁 ($78) 亦非常吸引，龍蝦好有睇頭，面層鋪滿半溶芝士，味道鹹香，肉質結實鮮甜，配上 Creamy 的白松露忌廉汁同幼滑的天使麵，真係一食難忘！

餐廳：Lockeroom Express (佐敦)
地址：佐敦彌敦道216-228號恒豐中心低層地下16號舖

之前去過旺角黃店Lockeroom Dining，佢地喺一間足球主題餐廳⚽️，力捧阿仙奴，2020年開多咗間油麻地分店，最近仲係佐敦恒豐中心低層地下開咗間西式快餐店，推出多款輕食便食

同朋友3點幾嚟到食咗個super late lunch，我哋兩個都餓到一個極點，所以就老實不客氣叫咗好多嘢食。喺收銀姐姐嘅熱情款待同介紹下，我地叫咗個法國野菌鮑魚雞肉香草醬意大利蝴蝶粉($68)同波士頓龍蝦配白松露忌廉汁意大利扁麵($78)，呢到嘅餐湯仲係任飲，等緊嘢食果陣都飲咗兩碗

估唔到又鮑魚又龍蝦，每款先係六七十蚊。鮑魚爽口彈牙，雞肉唔會好嚡，配上香濃香草醬，夠哂惹味；龍蝦有半隻，仲開埋殼，超貼心，呢個質素同份量真係超值！完全唔似輕食快餐店會搵到嘅食物

另外叫咗個白松露忌廉炒野菌配自家製蒜蓉包($38)，一客有2件，蒜蓉包就細件咗少少，但勝在白松露忌廉炒野菌都幾多，將野菌同白松露忌廉加上去蒜蓉包到食又係另一種滋味

甜品有橘子白朱古力芝士蛋糕($28)同特濃朱古力蛋糕 ($28)，每款蛋糕都有幾層layers，我食果件係特濃朱古力蛋糕，除咗有濃厚朱古力香，仲有忌廉芝士同鬆脆餅底，口感豐富，做飯口甜品就啱晒

叫嘢食唔包飲品，想飲嘅話就$19起一杯喇☕️。但如果以一間西式快餐店嚟講，雖然等嘅時間可能都要十分八分鐘，但食物選擇同質素就真係超晒班。仲要係正彌敦道，經過不妨一試