這間位於銅鑼灣鵝頸橋的牛之鍋，主要以日式放題為主，可選擇日本料理+火鍋及甜品或只選火鍋及甜品，兩者價錢相差數十元。
刺身款式十多款，其中劍魚腩及三文魚都很鮮甜。
天婦羅的粉漿都算算薄，炸至金黃香脆。
醬汁牛舌彈牙、金菇牛肉卷夠腍。
燒菠蘿香甜無渣。
火鍋方面有多款海鮮任食，包括了海蝦、廣島蠔及鯇魚腩等，非常新鮮，海蝦彈牙，魚腩鮮甜嫩滑。
牛肉方面有兩款，肉質嫩腍亦不算太肥，另外還有羊肉及豚肉，味道不錯，不會有騷味。
其他配料主要是丸類、餃子及蔬菜等等，味道不過不失。
女士們最愛的主角甜品有廿多款，但眼闊肚窄，只能揀了幾款品嚐一下。
抹茶芭菲綠茶味濃，有奶香味，出面食一杯都要$5-60。
伯爵茶奶凍有淡淡茶香，奶味出眾。
整體款式甚多，價錢合理，絕對是人多聚會之選。

好友快將生日，想同佢食餐飯慶祝，朋友出名係個「邊爐精」，吃火鍋就最適合不過，既暖胃又暖心。

揀咗銅鑼灣堅拿道西呢間日式火鍋店「牛之鍋」，餐廳最近推出咗個午市兩小時火鍋任食放題，成人每位只是 $118，就可以任食多款肉類、火鍋配料、蔬菜、甜品及飲品，如果 +$56 仲有刺身海鮮任食，CP 值超高。一場嚟到，當然唔可以錯過。

湯底可以揀一人一鍋，我點咗九州豬骨湯，而友人就選了蕃茄薯仔牛粒湯。兩款湯底味道都唔錯，豬骨湯湯色金黃，入口帶濃郁豬骨鮮味；而薯仔牛粒湯亦茄香突出，鍋內不少薯仔和牛肉粒，絕對真材實料。

任食嘅肉類有 5 款，當中包括有：美國肥牛、美國極上牛肉、紐西蘭羊肩肉、特選豚肉及五香鮮雞件。美國肥牛質感嫩滑軟熟，咬落不會滿口韌筋同肉渣；而極上牛肉嘅肉質就相對較瘦，牛味亦較濃郁。

羊肩肉同豚肉，食味亦不俗，羊肩肉嘅羊羶味雖然都幾重，但肉質好柔嫩，肉味濃郁並帶有油香；而薄切的豚肉，油脂質素亦上佳，入口甘香不膩。

配料方面，蔬菜、菇類同麵食就全部放咗喺自助吧檯，客人可以自行外出拿取。行咗一圈，有 6 款蔬菜、 蕃茄、南瓜、粟米、金菇......等等，選擇都幾豐富。

另外丸類、餃類、刺身、海鮮同甜品，就以剔紙仔形式點選， 我哋每樣都點咗一啲試下。麻吉燒外皮滑嫩，咬落煙韌 Q 彈，口感超正。粟米餃味道清甜，入口 Juicy 有肉汁；而風琴豆腐亦很好吃，吸滿了湯底的精華，夠晒入味。

刺身方面，選擇雖然唔算好多，只有 8 款，不過整體嘅質素都唔錯，三文魚切得唔會太薄，夠肥美又鮮甜。鮑片賣相唔錯，食落有咬口；而甜蝦嘅質素亦甚佳，入口鮮甜黏爽。

海鮮配料方面，點咗海蝦、廣島蠔、鮑片、牛柏葉同台灣鴨血。海蝦十分新鮮，肉質結實彈牙。廣島蠔夠晒大隻，就算唔小心淥耐咗都仲啖啖肉！牛柏葉很爽口，滾一會便可夾上來吃。鴨血非常腍滑，既大塊又厚身。

甜品方面，款式有榴槤班戟、朱古力慕絲、伯爵茶奶凍、芒果布甸、冰糖雪耳燉木瓜、香草綠豆沙、軟雪糕等。奶凍有好濃嘅伯爵茶味，口感很滑。木瓜嘅味道好清甜，加上爽口的雪耳，簡直是絕配。綠茶雪糕茶味回甘，但又唔會太嗆，質感幼滑，如果想口感更豐富，仲可以加啲雪糕配料上面。

另外飲品櫃入面就放咗好多罐裝同紙盒裝嘅飲料，全部都係任飲。以呢個價錢可以食到咁有質素嘅任食火鍋，真係超值。

近排天氣急速轉涼，要暖下身，火鍋係不二之選加上火鍋都係我嘅最愛之一，見到銅鑼灣呢間火鍋店，價錢親民得嚟，而且肉質同配菜選擇都好多，於是同朋友仔入咗去食lunch

嗜辣嘅我地揀咗麻辣湯底，湯底濃郁，麻辣味非常突出，辣得好惹味，同所有配料都好夾，好好味

肉類選擇都好足，有美國極上牛肉、美國牛肉、特選豚肉、紐西蘭羊肩肉，個人最鍾意美國極上牛肉，牛味重，厚薄適中，油花分布都好均勻，encore咗好多碟

其他火鍋配料都好多元化，令人眼花撩亂，有唔同嘅丸、餃子、蔬菜等等，每樣都好索味，蔬菜全部都好新鮮，咬落爽脆有咬口

飲品同甜品都好多揀擇，我同朋友揀咗荔枝烏龍茶，甜甜哋又幾refreshing，啱晒打邊爐，甜品方面叫咗4款，最鍾意藍莓芝士同芒果布甸，芝味非常濃郁厚身，入口綿順creamy，同酸酸甜甜嘅藍莓好夾芒果布甸入口絲滑，芒果味香濃，仲有淡淡既奶味，而且啖啖都食到果肉

餐廳環境乾淨企理，闊落唔逼夾，衛生情況都幾唔錯火鍋嚟講真係又抵食又好味，係銅鑼灣只需$118就可以食到，好滿足啊