今日係恐龍日，同朋友睇完侏羅紀電影後揾返間以恐龍為主題嘅餐廳試吓，餐廳環境佈置出叢林感覺，入面仲有好多恐龍裝飾，非常特別

腐皮壽司
呢間餐廳最出名係日式腐皮壽司有多種配搭，一定要試一試。我就點咗炙燒洋蔥忌廉帶子、芝士蟹籽厚燒玉子、辣味三文魚同牛油蒜香赤蝦。

帶子都幾大粒同鮮甜，上面有少少忌廉醬酸酸哋配埋甜甜哋嘅腐皮中和返，完美配搭。 厚燒玉子上面鋪咗蟹籽，趁熱食，正！辣味三文魚個辣度唔算好勁，意外地同腐皮既甜味幾夾～牛油蒜香赤蝦呢個組合冇得輸，絕對推薦呢款

除咗腐皮壽司，餐廳仲有多款特式卷物，沙律，飯團，炸物，甜品。我就點咗份卷物同炸雞。

夏威夷肥仔
見個名咁得意，就一於試吓有幾肥仔原來係鰻魚芝士青瓜卷，上面有少少蔥花蟹籽點綴同淋滿沙律醬、鰻魚汁，好邪惡，唔怪之得叫肥仔，各款卷物都可以叫半份或全份，啱晒想試多幾樣食物或者怕肥仔嘅朋友

蜜糖芥末炸雞
食落好香芥末味，但又唔會嗆鼻，加上蜜糖甜甜哋，熱辣辣，脆卜卜，真係停唔到口

奶蓋白玉烏龍
白玉好煙韌，奶蓋烏龍入口唔會太甜，反而有少少鹹味，唔會膩✨除咗有多款特色飲品選擇，餐廳仲有提供酒類飲品，有時間叫返杯配炸物chill下都唔錯

作為恐龍迷，發掘到呢間咁有特色既主題餐廳後，絕對會黎多幾次打卡食野

Donki 沿著行人扶手電梯上去, 去到大館再搭多一條梯向左望就會見到。
佢有落地大玻璃, 日夜都會有唔同既景色, 感覺。
日頭就比較文青,夜晚就靠店內一串又一串既小燈泡營造浪漫既氛圍。
原本以為地下就會坐位, 點知只係reception 同廚房, 坐位就要行上一層先到。
但係咁樣就有種探索神秘地方既感覺,
大家黎到唔建議係咁望手機,因為每個角落都係舖頭用心佈置的。

腐皮壽司就一定要叫,見佢配既Topping 都不錯, 有拖羅, 三文魚, 左口魚等等。
因為都唔算平, 都係想嘗鮮咁叫左5件。
灸燒北寄貝沙律(HKD$29),
蔥吞拿魚拖羅蓉(HKD$34)
蟹膏甜蝦(HKD$34)
明太子芝士蛋黃三文魚 （HKD$35)

拖羅真係好食，又夠多一啖放落口大滿足！

西雅圖鬼妹(Half HKD$74)
灸燒三文灸包住件壽司,壽司夾左牛油果同三文魚,
口感軟軟的, 容易入口。

咁食我地都唔係好夠飽, 再叫左個鰻魚滑蛋飯 ($198), 但係食完係會飽到頂住左, 因為都幾大份。

黃金吉列蠔，我覺得呢個就一般般，可以叫其他～

奶蓋白玉烏龍 ($62)
呢個真係招牌, 除左影相好睇,
奶蓋上面舖左炒香左既茶粉, 連埋白玉食好香茶味, 白玉本身軟糯, 唔會痴牙。
呢度仲有酒類, 有cocktail 飲, 下次要試下。

最後點左個Tiramisu食, 一黎我地疑惑左一陣, 呢個真係Tiramisu 咩?
睇真D, 原來係Tiramisu Style 既Affogato
用手指餅舖底, 中間係生朱古力, 朱古力脆皮包住雲尼拿雪糕係最頂,
咖啡另上, 濃度可以自己調校。
都幾得意, 我中意佢既生朱古力好夠濃。

整體係幾好, 地點又易去。

為食龍顧名思義這店有好多QQ恐龍
無論壁畫、擺設、任何角落都找到。
地方好寬闊，可以選擇不同背景用餐每個角落都好靚。
今日食咗午餐:迷你火炙海鮮刺身丼配搭冷烏東麵
天氣咁熱，即食凍烏東，湯味濃又夠凍，好正。
迷你飯嘅刺身有：呑拿魚、左口魚、帶子、玉子，刺身新鮮，彈牙又大片。
飲品：奶蓋白肉烏龍
底部係烏龍茶
白色嘅係奶蓋（甜）
有3粒丸子係白玉（煙煙韌韌嘅糯米糍)澆上去嘅粉末係用威化餅壓碎，整到質感似(木糠)好花心思嘅飲品。

係中環如果行斜路就有排行，搭半山扶手電梯係一個中途位一落就係，方便好多。餐廳好多綠色元素，樓高兩層，空間感大之餘仲有好多打卡位，連餐牌都設計得好有心思

呢到一定要食腐皮壽司！OH MY GOD，揀咗7件，但真係件件都好出色

以下7款由我自己喜好排
1. 炙燒北寄貝沙律 ($29)
2. 明太子芝士蛋黃三文魚 ($36)
3. 葱吞拿魚拖羅蓉 ($35)
4. 柚子左口魚 ($35)
5. 芝士蟹籽厚燒玉子 ($29)
6. 有子胡椒油甘魚蓉 ($30)
7. 辣味三文魚 ($35)

~其實款款都真係好好食！腐皮薄身甜甜地，滿滿裝住啲醋飯同餡料。每款壽司餡都設計得好match 真係食每一件都哇呢個好食喎。下次要試埋其他款添呀

夏威夷肥仔 ($78/Half)
: 個名咁得意其實就係芝士蟹籽鰻魚卷 多多既芝士同沙律醬仲有鰻魚汁，邪惡得黎好好食。然後仲有青瓜，所以咬落有鰻魚之餘又唔會單調，唔錯。

免治雞肉軟骨棒 ($78/2串)
: 唔算話好大串，不過勝在好食。沾日本生雞蛋同醬油，好濃雞蛋同雞肉味，軟骨咬落小小爽脆，夾係Q彈雞肉之間，嚼勁同味道都一樣咁好。

為食龍 Hungry Dino
———————————————
：記得以前喺銅鑼灣係有間細細間，同名，唔知係咪同一間呢？因為以前都成日食，好好食。有無人可以話比我知？依家呢間超大間超靚，氣氛又好，好岩傾計！推介x3!不過location有少少難搵，要落多啲眼力，但絕對值得！

———————————————
岩手串燒拼盤
有免治雞肉軟骨、雞皮、雞腎、雞柳。唔好睇個樣好似好普通，好食過好多所謂嘅居酒屋。有香烤味，雞肉夠香滑又夠肉汁，雞腎新鮮，雞皮夠厚兼外脆內軟。撈埋蛋黃，正！唔

_
焦糖肉桂蘋果配雪糕
勁！好！味！窩夫外香脆內軟，粒粒肉桂蘋果醬味道清甜，仲配埋新鮮爽口蘋果、密密麻麻嘅餅碎、黑芝麻雪糕(仲唔會好快就溶哂)，最後再加埋秘製甜品醬汁，絕對會食到個心溶晒！黑芝麻呢個配搭十分聰明，完全中和返其他嘢嘅甜味，所以放心，唔使怕好甜食唔到！

_
奶蓋白玉烏龍
推介！嗌咗先知原來係個個都會嗌嘅飲品，烏龍茶味好香，最驚喜係面頭嗰三粒麻糬波波，煙煙韌韌，沾滿餅碎好有口感，賣相又可愛。宜家先知奶蓋茶上邊加啲餅碎會咁好味，會將岩鹽嘅味道帶出嚟，而且會令到飲品嘅口感更有層次。

———————————————

#中環美食 #香港美食日記 #香港美食地圖 #香港美食 #食好西 #hkg #hkfoodie #hkfoodblogger #instafood #foodstagrams #foodlover #hkfoodlover #foodshare #igfood